Rafael Alegría, dirixente campesiño de Honduras e membro da Coordinadora Internacional da Vía Campesina, está na clandestinidade perseguido polo goberno de facto.

> Pronunciamento de Rigoberta Menchú (pdf)

> Pronunciamento de Fidel Castro (Granma)

En comunicación telefónica con Prensa de Frente, denuncia que o levantamento está protagonizado polas Forzas Armadas, pero sostido pola Corte Suprema e as forzas conservadoras de oposición ao deposto presidente democrático Manuel Zelaya Rosales.

Cal é a situación esta noite, a partir do secuestro do presidente?

Esta mañá produciuse un golpe de estado, levado adiante polas Forzas Armadas e que contou co apoio da Corte Suprema de Xustiza e o visto e prace das forzas de oposición representadas no Congreso. O presidente Zelaya foi secuestrado por integrantes do exército que irromperon encarapuchados no Palacio de Goberno. Tamén foi detida a Chanceler, Patricia Rodas. O Parlamento, co aval das forzas conservadoras do país, declarou a Roberto Micheletti, presidente do Poder Lexislativo nacional, como novo presidente en contra da vontade popular.

Como reaccionou o pobo por estas horas?

O pobo hondureño lanzouse masivamente á rúas contra o golpe de estado, o rexeitamento é xeneralizado. Para mañá luns 29, as tres Confederacións Sindicais do país, o Bloque Popular e as Centrais Campesiñas chamaron a unha folga xeral para mañá. Esta noite nas mobilizacións rexistráronse ataques a balazos por parte das forzas de seguridade. A partir da medianoite entra en vixencia o toque de queda por 48 hs.

Temos entendido que vostede ten orde de captura?

Así é, ditouse unha orde de captura contra a miña persoa. Actualmente atópome en Tegucigalpa, participando das mobilizacións populares, e pedín que interceda a Comisión Interamericana de Dereitos Humanos, para garantir a miña liberdade e a miña integridade física.

Hai algunhas horas difundiuse a información de que os militares detiveron varias representacións diplomáticas de países latinoamericanos. Que información ten vostede?

Isto é correcto. Ata a Organización de Estados Americanos pronunciou unha dura condena e non recoñece a Micheletti, como novo presidente, á vez que solicita a inmediata devolución do cargo a Zelaya. Con respecto aos ataques diplomáticos, o embaixador de Venezuela, o de Nicaragua e o de Cuba estaban xunto á Chanceler Rodas en momentos que foron secuestrados polas Forzas Armadas. Sabemos que horas despois foron liberados os diplomáticos, non pasou o mesmo con Rodas e aínda non sabemos onde se atopa. Solicitámoslles aos pobos irmáns de toda a rexión que expresen a súa repudio ao golpe mobilizándose ás embaixadas do noso país en todo o continente.