Manoel Santos, representando ao Seminario Galego de Educación pola Paz (SGEP-Fundación Cultura de Paz), e ao Comité organizador do Foro 2010 en Compostela, que amais dunha serie de congresos académicos e xuntanzas de alto nivel xirará en torno a un Foro Mundial de Educación (FME) temático –por primeira vez en Europa– sobre educación, investigación e cultura de paz, estivo en São Paulo invitado pola prefeitura de Osasco e o Instituto Paulo Freire, para participar neste primeiro evento do ano, así como para transmitir o convite galego ao evento de Compostela en decembro e observar diversos aspectos da organización.

O segundo evento de Osasco foi un Foro Mundial de Educación Infantoxuvenil, ao que asistiron máis de 3.500 persoas, entre eles 1.800 nenos e nenas das escolas paulistas, que participaron de decenas de actividades autoxestionadas e un bo número de presentacións de experiencias educativas de todo o mundo. O representante galego, xunto aos membros do Consello Internacional do FME, os organizadores dos foros de São Paulo e Palestina e diversas autoridades, participou do acto de abertura saudando aos presentes e convidándoos novamente ao Foro de Compostela.

Así mesmo, Santos acudiu convidado o día 26 á inauguración dun novo Centro Educacional Integrado (CEU, que tamén fai referencia ao ceo) nunha das moitas favelas de Osasco. Os CEU, son grandes instalacións divididas en tres módulos –educación, deporte e cultura– que tratan de substituír nos barrios máis pobres ás chamadas “escolas de lata” e que cambian non só a educación nestas comunidades, senón tamén a vida de todo o barrio. O CEU recén inaugurado recibiu o nome da Dra. Zilda Arns, en homenaxe á presidenta da Pastoral da Criança, morta o mes pasado vítima do terremoto no Haití.

DE PALESTINA A GALICIA

O segundo evento asumido polo FME este ano acontecerá en 6 cidades palestinas entre o 27 de outubro e o 1 de novembro. Tratarase dun FME temático sobre multiculturalidade.

Seguidamente, entre o 3 e 15 de decembro de 2010, terá lugar o Foro 2010 de Compostela. Este contará, amais dunha xuntanza do Consello Internacional do FME, cos seguintes eventos,:

1. Foro Mundial de Educación Temático sobre "Educación, Investigación e Cultura de Paz", do 10 ó 13 de decembro de 2010. Actividades autoxestionadas.

2. Congreso Internacional sobre Información e Dereitos Humanos. Do 7 ao 8 de decembro de 2010.

3. Cumio Internacional sobre o Dereito Humano á Paz. Do 9 ao 10 de decembro de 2010.

4. Congreso Internacional sobre Memoria, Reconciliación e Cultura de Paz. Do 14 ao 15 de decembro de 2010.

5. Xuntanza de Membros do Grupo de Alto Nivel de Nacións Unidas para a Alianza de Civilizacións e do Decenio da Cultura da Paz e a non violencia para tódolos nenos e nenas do mundo, 2001-2010. Do 4 ao 6 de decembro de 2010.

6. Actividades artísticas e culturais paralelas (Pintura, fotoxornalismo, cinema, banda deseñada, videoxogos, literatura e música). Do 3 ao 15 de decembro de 2010.

Durante o mes de marzo comezarase co proceso de inscrición e presentación de actividades autoxestionadas –para o Foro Mundial de Educación temático– e de comunicacións para os congresos.

QUE É O FME?

O Foro Mundial de Educación é un movemento moi novo. Está completando 10 anos de existencia dende que se constituía en Porto Alegre (2001), paralelamente ao Foro Social Mundial, como un espazo horizontal de aprendizaxe, un espazo aberto e autoorganizado que envolve tanto a educación non formal como a informal. Pretende congregar cada vez máis persoas, institucións, gobernos e organizacións ao redor dunha plataforma mundial de loita en defensa do dereito á educación emancipadora.

Para os participantes do proceso do FME, o neoliberalismo concibe a educación como unha mercadoría, despreza o espazo público, reduce as nosas identidades á condición de consumidores e nega a dimensión humanista do proceso educacional. Opoñéndose a tal perspectiva, o FME defende unha concepción liberadora, que respecta e convive coa diferenza, promovendo a interculturalidade e recoñecendo a educación como dereito social universal ligado á condición humana.

MÁIS INFORMACIÓN:

Documento final do Foro Mundial de Educación Infantoxuvenil de Osasco (São Paulo)

Contribucións do Encontro Internacional de Educación de Osasco á Plataforma Mundial de educación do FME

Osasco vira a capital mundial da Educação por cinco dias

Educação como Direito Humano